በስመ አብ ወወልድ ወመንፈስ ቅዱስ አሐዱ አምላክ፤ አሜን፡፡

በዲያቆን ብርሀኑ አድማስ

ትላንት እህቴ ከጣልያን ሚላኖ ከነገረችኝ ውስጥ በጣልያን በኮረና ቫይረስ ምክንያት ከተፈጠረው ፍርሃትና ጭንቀት የተነሣ ስድስት ሰዎች በጭንቀት ራሳቸውን ከፎቅ ወርውረው ውድ ሕይወታቸውን አጥተዋል፡፡ ይህ በእጅጉ ያሳዝናል፡፡ ምክንያቱም በበሽታው ቢያዙ እንኳ ከሞት የከፋ የሚደርስባቸው አልነበረም፡፡ ሲሆን ደግሞ ላይያዙም ይችሉ ነበር፤ ወይም ታምመው ሊድኑ እየቻሉ እንዲሁ በጭንቀትና በፍርሃት ራስን በዚህ መንገድ እስከማጣት መድረስ አንዳንድ ጊዜ አስተያየት ለመስጠትም ያስቸግራል፡፡ ምክንያቱም ራሳቸውን ያጠፉት ሞትን ፈርተው ነውና፡፡ ስለዚህም ፍርሃታቸውና ጭንቀታቸው ሞታቸውን ከማስቸኮሉ በቀር አልጠቀማቸውም። ራሳቸውንም ለመቆጣጠርም አቅም አጥተው ቀድመው እስኪሞቱ ድረስ ራሳቸውን መሳታቸው በእጅጉ ያሳዝናል፤ ልብንም ይሰብራል፡፡

ወደ አውሮፓ ለመግባት በደካማ ጀልባዎች ሲጓዙ በባሕር ውስጥ የሚያልቁ አፍሪካውያንን ሬሳዎች ለቅመው ሰብስበው የሚቀብሩ ብዙ ደግ ሰዎች ያሉባት ጣልያን እንደዚህ በሆነ ሁኔታ በአጭር ጊዜ ከበሽታው ጋራ ተስፋ መቁረጥም ሲቀጣቸው ማየት በእውነት በእጅጉ ያሳዝናል፡፡ ከዚህም ሁሉ ጋር ደግሞ በየቤታቸው ያሉት የሰዎችን ጭንቀት እንደመስማት ያለ የሚያሳዝን ነገር የለም፡፡ ትላንት በስልክ ካነጋገረችኝ እህቴ ጋር የነበረችኝን አጭር የስልክ ቆይታ ለመጨረስ ምን ያህል አስጨናቂ እንደነበርና ስሜትን ተቆጣጥሮ ለመነጋገር ምን ያህል እንደተቸገርኩ ሳሰብ የተፈጠረው ጭነቀትና ፍርሃት አሁንም በእጅጉ ያሳስበኛል፡፡

ከዚህም ሁሉ ጋር ብዙ ክርስቲያኖች ካህን ለማናገር ፈልገው አለመቻላቸው፣ ጸበል ፈልገው አለማግኘታቸው፣ መቁረብ ፈልገው አብያተ ክርስቲያን ዝግ መሆናቸውና መንቀሳቀስ የማይፈቀድላቸው መሆኑ ተጨማሪ ፍርሃትና ሐዘን እንደጨመረባቸው መስማትም ሌላው አሳሳቢ ጉዳይ ነው፡፡

ታዲያ ምን እናድርግ

በተለይ በውጭ ሀገር ላላችሁና ይህን መልእክት ማንበብ ለምትችሉ ሁሉ መፍትሔ የምላቸውን እንደሚከተለው እጠቁማለሁ፡፡

1) ሚዲያው በሚፈጥረው ጫና ምክንያት የሚፈጠርባችሁን ጭንቀት ለመቀነስ ስለበሽታው ዕድገት ሥርጭትና አሳሳቢነት ብቻ የሚተላለፉ ዜናዎችን፣ ሐተታዎችን በቀን ከአንድ ጊዜ በላይ መስማት ብታቆሙ መልካም ይመስለኛል፡፡ እንዲያውም ከተቻለ በጉዳዩ ላይ በተለያዩ ሚዲያዎች ከሚቀርቡት ትንታኔዎች መካከል በተለየ መንገድ የሚቀርቡና በሽታውን በሌላም መንገድ ማለትም በእውነተኛ የሰው ልጆች ሕይወት ገጠመኝ ውስጥ እንዳንዱ ብናየው መልካም ሊሆን ይችላል፡፡

2) ንስሐ ለመፈጸም፣ ጸበል ለመጠጣት ለመቀባባት፣ ለመጠመቅ፣ ቁርባን ለመቁረብ ፈልጋችሁ በችግሩ ምክንያት ያላገኛችሁ ከማድረግ ልታገኙ የምትችሉትን ሥርየትም ሆነ በረከት እንዳጣችሁ ማሰብ የለባችሁም፡፡ የመጀመሪያው የሚያስፈልገው ተስፋ በመቁረጥና በመጨነቅ ሳይሆን በተሰበረ ልቡና ሆኖ የንስሐ ዕንባ ከዐይናችን የምናፈስስ ከሆነ ሁሉም ከላይ የፈለግናቸው ነገሮች በእምነት ይደረጉልናል፡፡ ቅዱስ አትናቴዎስ በቅዳሴው እኛ ስላሉን ሦስት ልደቶች ሲያብራራ ፡- አንዲቱ ክርስቶስን የምታስመሰለን ቅድስት ጥምቀት ናት፡፡ አንዱም በደልንና ኃጢአትን የሚያስተሠርይ የክርስቶስ ሥጋውና ደሙ ነው፡፡ አንዱም ንጹሕ አድርጎ ወደ እግዚአብሔር የሚያቀርብ ከሰውነት ውስጥ በዮርዳኖስ አምሳል የሚወጣ በንስሐ ያለ እንባ ነው፤ እንዳለ በአሁኑ ጊዜ የሚደረግ እውነተኛ የንስሐ እንባ በዮርዳኖስ ተጠምቆ በኃጢአት ያጎሰቆልነውን ልጅነት የሚያድስልን ስለሆነ እውነተኛ ጸበል ነውና ጸበል አላገኘንም አትበሉ፡፡

እውነቱን ለመናገር በፍጹምነትና በእምነት የምናመልከው ከሆነ በመቅድም ተአምረ ማርያም ላይ እንደተጻፈው የተቻለው ሥጋውን ደሙን እየተቀበለ ያልተቻለው ደግሞ የእመቤታችን ተአምራት በተለያየ መንገድ እየሰማ ይደረግልኛል እያለ ቢያምን ልክ እንደተቀበለ ይሆንለታል፤ ይደረግለታልና ሳይቻለን ባላገኘነው ነገር አንጨነቅ አንፍራ፡፡ ይልቁንም እንመን፣ እንጽና፡፡ አስተውሉ ክርስቲያኖች፤ እመቤታችን ንጽሕት ቅድስት ድንግል ማርያም የሰው ዘር (የባሕርያችን) እውነተኛና ብቸኛ መመኪያ ናት፡፡ በመጽሐፍ እንደተጻፈ ከእርሷ በቀር አካላዊ ቃልን ለመቀበል የተገባው አልተገኘም። እርሷ ግን የተገባት ሆና ተገኝታለችና በእርሷ አማላጅነት ልባችንን እናሳርፍ፡፡ ስለዚህ በአማልጅነቷ አምነን ከልጇ ታስታርቀን ዘንድ ተስፋና እምነት ባልተለየው የንስሐ እንባ እንለምናት፤ ልታማልደን የታመነች የምሕረት እመቤት ናትና፡፡ ተአምሯንም እንስማ፡፡ ከዚህም ሁሉ ጋር በቤታችን ሆነን በጸጥታ በሚዲያና በወሬ ሳናቋርጥ ወንጌልን እናንብብ፣ በጸሎትም ዘግተን እንነጋገር፤ ይህን ብናደርግ መድኃኒትና መፍትሔ ስለሚሆነን እንረጋጋለን፤ ክፉውንም እናሸንፋለን፡፡ እምነትና ተስፋ ተለይቶን ከሆነ ግን ዕድሉን አግኝተን ጸበል ብንጠጣና ብንቆርብም ትርጉም አይኖረውም፡፡ ስለዚህ አምነን ባለንበት በቤታችን ሆነን በእምነት ጸንተን፣ በተስፋ ተሞልተን ቅዱሳት መጻሕፍትን እየሰማን እንጸልይ ዘንድ እማጸናችኋለሁ፡፡

3) ለዚህ ጽሑፍ በመጨረሻ ማንሣት የምፈልገው አሁንም በእግዚአብሔርና እርሱ ባከበራቸው በቅዱሳኑ ላይ ያለንን መተማመን እንድናሳድግ ነው፡፡ በጣም የሚገርመኝ ሚዲያውን የምናምነውን ያህል በቅዱሳን ገድል ብናምን ምን ያህል በተጠቀምን ነበር፡፡ ሰዎች አፋቸውን ሞልተው በሳይንስ አምናለሁ ይላሉ፤ እኛስ አፋችንን ሞልተን በፈጣሪና በሥራው ለምን አናምንም?

ለምሳሌ ስለበሽታው በሳይንስ የሚመከረውን እንደምንቀበለው ሁሉ በእምነት ያለውንም መቀበል አስፈላጊ ነው፡፡ እውነቱን ለመናገር የሴራ ተንታኞች ቫይረሱ አውቀው የፈጠሩት ነው፤ እገሌን ለማጥቃት ነው፣… የሚለውን ወሬ ከማዳነቅ ያ ሆነም አልሆነም እንዲህ ያለው ትልቅ ክስተት ያለፈጣሪ ፈቃድም እኮ አይከሰትም፡፡ ኢዮብ ላይ ብቻ ያን ሁሉ መከራ እንዲያመጣ ፈጣሪ ለሰይጣን እንደፈቀደለት ልክ እንዲሁ ለመቅሰፍትም ለተግሣጽም ወይም ለማናውቀውም ምክንያት ፈጣሪ ክፉው ሰይጣን በእኛ ላይ ሊያደርግ የሚፈቅድለት ጊዜ እንዳለ ከታሪክም ከቅዱሳት መጻሕፍትም ተምረናል፡፡

እኔ በግሌ እንዲህ ያለው ተላላፊ በሽታ ያለ ሰይጣን የሚደረግ ነው ብዬ ለመቀበል አልችልም፡፡ ይህም ማለት ሰይጣን በብዙ መንገድ በሽታዎችን ያመጣል፤ የተፈቀደለት ጊዜም አጭር ስለሚሆን እንዲሁ በፍጥነት አዳርሶ ብዙዉን ረብሾ ተስፋ አስቆርጦ ከቻለም አስክዶ ሥጋንም ነፍስንም መንፈስንም አጎስቁሎ ለመሄድ ይፋጠናል፡፡ በድርሳነ ሚካኤል ላይ እንደተገለጸው አብዛኛዎቹ እንዲህ ያሉ በሽታዎች ከመናፍስት ጋር የተያያዙ ስለሆነ እንደ ድርሳነ ሚካኤል፣ ድርሳነ ገብርኤል፣ ድርሳነ ሩፋኤል፣ ገድለ ቂርቆስ፣ ገድለ አቡነ ሀብተ ማርያምና በመጨረሻም ሁልጊዜም ቅዱስ ወንጌልን በመስማትና በመጸለይ ብናጠቃልለው ልንቋቋመውና ልናሸንፈው እንችላለን፡፡

በትዝታ ዘአለቃ ለማ ላይ እንደተገለጸው ልቡሰ ሥጋ የሚባለው በሰው ላይ ደዌ በማምጣት የሚታወቀው መንፈስ በሚያደርስባቸው ጥቃት አባቶቻችን በጭንቅ ከታመሙ በኋላ ሁሉ እንኳ እንዴት በጸሎትና በእምነት ድል እንደሚነሡት ብዙ ጊዜ የሰማን ያነበብን ይመስለኛል፡፡ ያን የሰማነውን ያነበብነውን ሁሉ አስታውሰን በእንዲህ ያለው ወቅት ካልተጠቀምንበትና ከጭንቀት፣ ከፍራሃትና ከእምነት ማጣት በመጨረሻም ከተስፋ መቁረጥ ካልተጠበቅንበት ለመቼ ያገለግለናል? ወይስ መጻሕፍቶቻችን ሀሉ ልቦለድ ይመስሉናል? እንግዲያውስ እምነታችን አጽንተን በፍጹም ተስፋ ተሞልተን እንጸልይ እንጂ አንጨነቅ፡፡

ቤት መዋላችንም ቢሆን በቤት መዋል ካለማወቃችንና በወከባ ውስጥ ከመኖራችን የተነሣ ጭምር ከብዶን ይሆናል እንጂ ምን አልባት እግዚአብሔር ለሕይወታችን መረጋጋትም እያስተማረን ስለሚሆን እንደ እሥራት አንቁጠረው፡፡

ሁሉንም ለእግዚአብሔር ክብር የምንችለውን ሁሉ ካደረግን በኋላ ግን ብንኖርም ለእግዚአብሔር ለመኖር (በንስሐችን ጸንተን) ብንሞትም ለአግዚአብሔር (ከእርሱ ጋር ለመኖር) መሆኑን አምነት እርስ በእርሳችን መጽናናትና መረጋጋት ይገባናል፡፡ የሰንበት ጌታ፣ ለሰው ድኅነት ሲል ሰንበትን ሳይቀር ሽሮ ሰውን የፈወሰ ይቅር ያለና ሰንበትም ለሰው እንጂ ሰው ለሰንበት ያልተፈጠረ መሆኑን ያስተማረ አምላክ አሁንም በሆነው ብዙዎችን ወደ እርሱ ያቀርበን ዘነድ በበሽታውም የታመሙትን ሁሉ ይፈውስ ዘንድ፣ በሽታ በሚያመጣው ክፉ መንፈስ የተጠቃነውን ብቻ ሳይሆን፣ በስስት፣ በስግብግብነት፣ በምቀኝነትና በቅንዓት፣ በምቾትና በቅምጥልነት እንዲሁም በሌሎች ክፉዎች መናፍስት ተወግተን ወድቀን ከእግዘኢብሔር የተለየነውን ሁሉ ይቅር ብሎ ዛሬም በከበረ ደሙ ፈሳሽነት ዐለምን ይቅር ይለው ዘንድ የእርሱ ፈቃድ ይሁንልን፡፡ የእናታችን የእመቤታችን የንጽሕት ቅድስት ድንግል ማርያም ምልጃ፣ የቅዱሳን መላእክት ጥበቃ፣ ከሴቶች ከተወለዱት የሚተካከለው የሌለው የመናኙ ነቢይ ሐዋርያና ሰማዕት የሆነው የመጥምቀ መለኮት የቅዱስ ዮሐንስ እና የሌሎች ቅዱሳን ሁሉ ምልጃና ጸሎት ከሁላችን ጋር ይሁን አሜን፡፡